ན་ལེ་ཤམ། ཕོ་རིས། = འདི་ནི་ཤིང་མ་ལྡུམ་ཡིན་པ་གང་ཞིག་རང་སྐྱ་མི་འཕེར་བ་ལོ་མང་སྐྱེ་བའི་འཁྲིལ་ཤིང་ཞིག་ཡིན་ཞིང༌། སྡོང་ཐུང་ཕྱི་སྐོགས་འཇམ་ལ་ཚིགས་མཚམས་ནས་རྐང་རྩ་ཡལ་ག་མེད་ལ་ལོ་མ་དང་འབྲས་བུ་ཆུང༌། ལོ་མ་སྒོར་ལ་རྩེ་རྣོ་བ་སྙིང་དབྱིབས་རེ་མོས་སུ་སྐྱེ་བ། ལོ་མའི་མཐའ་མཉམ་ལ་དཀྱིལ་གྱི་རྩ་རིས་ཀྱི་དྲྭ་བ་མངོན་གསལ་དོད་པ། མེ་ཏོག་ཚོམ་བུར་འཆར་བ། ལོ་མའི་མཚམས་སུ་འབྲས་བུ་ཟླུམ་པོ་གཉེར་རིམ་ཅན། འབྲས་བུ་སེར་ལ་རིམ་བཞིན་སྨིན་ན་དམར་པོར་འགྱུར་ཞིང་སྐམ་ཚེ་ནག་པོར་འགྱུར་རོ།