གསེར་གྱི་ཕུད་བུ། = འདི་ནི་འཁྲི་ཤིང་གི་རིགས་ཤིག་སྟེ། དངོས་པོ་གཞན་ལ་འཁྲིལ་ནས་སམ་ས་ངོས་སུ་རིང་པོར་གྲམ་ནས་སྐྱེ་བ། རྩ་བ་ཕྲ་ལ་རིང་བ་སྤུ་རྩུབ་པ། ལོ་མ་སྔོ་ལྗང་སྒོར་མོ་ཉག་ཟུར་ཅན་ཞེང་ཆེ་བ་འགའ་རེ་ཡོད་པར་ངོས་འཇམ་ཞིང་སྤུ་ཆུང་ལྡན་པ། མེ་ཏོག་སེར་པོའམ་དཀར་སེར་འདབ་མ་ལྔ་ཅན་འཆར་བ། འབྲས་བུ་ལྗང་ནག་གམ་ལྗང་སེར་དབྱིབས་ནར་མོ་ཅན་ལྟོ་བ་ཅུང་སྦོམ་ལ་མཐའ་གཉིས་རིམ་བཞིན་ཕྲ་ལ་གུག་པ་དང་རྩ་རིས་དོད་པ། ནང་ཤ་དཀར་པོ་རྩ་སྐུད་ཀྱི་དྲ་བ་རྒྱུས་པ་ལྟར་ཡོད་པའི་གསེབ་ཏུ། འབྲུ་གུ་སྒོང་དབྱིབས་ལེབ་ལ་མདོག་ནག་པོ་འབྱུང་བ་ཞིག་ཡིན། འབྲས་བུ་ཡོངས་སུ་སྨིན་པའི་རྩ་རྒྱུས་སྐུད་ཕུང་ལྟར་ཆགས་པ་དེ་སྐམ་སྟེ་སྣོད་ཆས་དང་ལུས་པོ་འཁྲུ་བར་སྤྱོད།